MEHORA COMUNICACION DEN BO RELACION Nos a caba aña 2018 cu e columna “Sexy couple new year’s resolutions” enfocando ariba mehoracion di intimidad y satisfaccion sexual di pareha.
Valentine’s day tambe ta un bon ocasion pa enfoca, no solamente ariba e parti externo, e rosanan, sexy lingerie y chuculati cu tradicionalmente ta forma parti di e dia, pero tambe pa reflexiona ariba e parti interno di nos relacion y comparti cu otro, algun puntonan di mehoracion.
Pa cu esaki, mi a sinta pensa ariba algun pregunta importante cu mi sa laga parehanan haci otro como ehercisio durante coaching, y cu kisas lo por yuda den tanto e relacionnan di termino largo, como esunnan cu a caba di cuminsa.
Sumamente importante, den ambos caso, ta comunicacion. Ta un lastima, pero esaki ta e problema mas comun den relacion y cu ta conduci na otro problemanan hopi mas serio. Pa mehora esaki mi kier a regalabo un lista di 25 pregunta, pa habri e comunicacion durante un dinner romantico.
- Si bo tin mal beis, kico bo lo prefera, pa mi laga’bo keto of pa mi purba drecha bo beis?
- Kico tawata bo prome impresion ora bo a mira’mi?
- Ki sacrificionan bo ta sinti cu bo ta haciendo pa nos relacion?
- Cua fantasia sexual bo lo kier purba cu’mi?
- Bo lo sintibo insigur si mi mester bay un reunion cu un persona di e sexo opuesto?
- Kico ta e miho momento cu bo a experiencia den nos relacion?
- Tawata tin un momento cu bo a pensa di kibra cumi/divorcia’mi?
- Con importante sex ta pa’bo?
- Den bo opinion, kico ta e cos mas importante pa un relacion exitoso?
- Kico abo ta considera “cheating”/infidelidad?
- Menciona algo cu ainda mi no sa di’bo?
- Kico abo mester pa sinti’bo stima?
- Bo ta sinti e necesidad pa sa mas di mi relacionnan di pasado?
- Kico mi sa haci cu ta pone’bo sinti incomodo?
- Menciona algo cu bo lo desea pa mi cambia?
- Bo ta haya cu mi ta demostra’bo suficiente aprecio?
- Den kico mi por mehora mi manera di comunica cu’bo?
- Con bo lo desea di pasa un dia special cu’mi?
- Cua palabra mi a yega di bisa’bo cu a haci’bo dolor of pone’bo rabia?
- Kico den bo concepto ta un momento romantico?
- Bo ta contento cu e nivel di intimidad cu nos tin?
- Ora bo ta sinti’bo ‘down’, ki palabra(nan) lo por yuda?
- Con importante duna/ricibi regalo ta pa’bo?
- Con comodo bo ta sinti’bo si mi mester keda amigo/a cu mi ex?
- Con importante matrimonio ta pa’bo?
Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook.
