Advertise on BonPaSa.com
Advertise on BonPaSa.com

Pakico bo no mester core poco poco den rijstrook links

(Reading time: 2 - 3 minutes)

road
Na Aruba nos tin camindanan cu dos rijstrook pa bay e mesun direccion; Sasakiweg y green corridor. Rond mundo ta comun y hasta obligatorio cu autonan coriendo relativamente poco poco ta core den e rijstrook rechts y e rijstrook links ta pa autonan cu kier core mas duro y pasa autonan coriendo den e rijstrook rechts. Tambe ta comun cu si caminda ta bashi bo ta core rechts, y si caminda ta basta yen y ambos rijstrook tin hopi auto, esunnan cu kier core mas poco poco ta core rechts y esnan bayendo mas duro ta core links. Pero pakico?
 
Traffic jams
Segun investigacion, un cantidad relativamente abou di auto por ta responsabel pa formamento di un traffic jam. Por ehempel, algun auto coriendo poco poco banda di otro y no tras di otro. Coriendo poco poco banda di otro, autonan patras no por pasa nan y e cantidad di auto nan tras ta keda acumula. Si dos (of mas) auto ta coriendo poco poco tras di otro (banda rechts), e rijstrook banda links por keda habri pa autonan cu kier pasa esunnan coriendo poco poco. Asina tin menos chens cu autonan ta acumula tras di otro y trafico ta pega.

Cambio di velocidad y cambio di rijstrook 
Investigacion ta mustra cu desviacion di e velocidad average cu autonan riba un caminda ta coriendo ta causa mas accidente cu core cu un velocidad (mucho) halto. Pues ta trata di un diferencia di velocidad cu ta haci cu autonan ta alcansa otro. Tambe a conclui cu un auto coriendo 8 kilometer pa ora mas poco poco cu e average cu ta wordo cori, tin mas chens di accidenta cu un auto coriendo 8 kilometer pa ora mas duro cu e average.

Imagina’bo cu autonan coriendo mas poco poco cu e average ta coriendo den tanto e rijstrook rechts y links. Esnan coriendo mas duro cu kier pasa e autonan coriendo poco poco lo mester core ‘zig zag’ continuamente cambiando di rijstrook pa pasa e diferente autonan coriendo mas poco poco. Probablemente nan lo mester keda cambia nan velocidad tambe.

Awo imagina’bo cu tur e autonan coriendo mas poco poco cu e average ta core banda rechts so. E autonan coriendo mas duro lo por pasa varios auto coriendo poco poco ‘pareu’ usando e rijstrook links, sin mester core ‘zig zag’ continuamente y keda cambia nan velocidad. Asina e chens pa accidentenan pasa ta bira menos, haciendo trafico mas sigur. Cambiamento di rijstrook ta un causa di accidente y bahando e necesidad pa mester cambia di rijstrook continuamente por baha e cantidad di accidente.

E custumber y disciplina di laga e rijstrook links habri pa esnan cu kier pasa y core mas duro por ta un motibo cu un pais manera Alemania, a pesar cu nan tin camindanan cu no tin un limite di velocidad, tin menos accidente cu paisnan caminda menos automobilista tin e custumber di laga e rijstrook links pa esnan cu kier pasa y core mas duro.

Den e video aki Vox ta duna un splicacion visual di pakico bo no mester core poco poco den e rijstrook links.