Advertise on BonPaSa.com
Advertise on BonPaSa.com

E importancia di sex den un relacion

(Reading time: 2 - 4 minutes)

couple sexy
Banda di su funcion pa cu reproduccion, sex ta importante den cualkier relacion di pareha, pa diferente motibo. Sex tin varios beneficio, tanto fisico como emocional. 
 
Den e area fisico estudionan ta demostra cu sex ta yuda kima caloria y vet, cu beneficionan parecido na ehercicio. Hendenan cu ta haci sex frecuentemente tin e tendencia di drumi miho, locual ta yuda nan sistema imunologico. Tambe nan tin e tendencia di cuida nan curpa miho, come miho y haci cosnan cu ta cuadra cu un bida saludabel.  
Sex ta algo sumamente beneficioso, no solamente pa e salud personal pero tambe pa e salud di e relacion en general.”
 
Sex ta beneficia tambe e salud emocional individual. E ta crea un sentido di intimidad, coneccion, satisfaccion y placer pa esnan cu ta practic’e regularmente. E contacto fisico ta resulta den nivelnan halto di oxytocin, cu ta wordo produci durante sex y sunchimento. Oxytocin ta conoci como e “love/cuddle hormone” cu ta promove sentimientonan amoroso. Un orgasmo generalmente lo reduci stress door cu e ta haci cu e curpa ta produci ‘endorphins’, e tipo di hormona aki ta activa centronan di placer den bo cerebro cu ta crea sintimento di intimidad y relahacion y ta yuda contra depresion. 
 
Sex ta algo sumamente beneficioso, no solamente pa e salud personal pero tambe pa e salud di e relacion en general. Satisfaccion sexual ta relaciona cu un bon calidad di bida. E frecuencia di sex ta influencia bo sentido di “well-being” y satisfaccion cu bo mes y cu bo pareha. Den un relacion, sex ta promove stabilidad, pasobra e ta stimula coneccion (‘bonding’), especialmente ora cu e deseo sexual di ambos wordo satisface.  
couple smiling
Ora abo y bo pareha ta sexualmente satisfecho, boso auto-estima ta subi, no solamente riba cama pero tambe den otro areanan di bida. Un bida sexual satisfactorio ta pone’bo sinti bo mes mas atractivo, mas deseable y mas sigur di bo mes, locual na su turno ta haci’bo un persona generalmente mas agradabel, positivo, carismatico y social den area personal y ta pone’bo bira mas asertivo y cu mas curashi pa tuma riesgonan den area profesional.   
Ami semper ta respeta e motibonan valido cu parehanan por tin pa abstene.”
  
Tin relacionnan den cual sex no ta wordo considera importante of no ta existente. Ami semper ta respeta e motibonan valido cu parehanan por tin pa abstene. Por ehempel malesa, invalidez of a-sexualidad, ta cosnan cu ta fuera di nan control. Pero si esakinan no ta al caso, mi kier enfatisa cu sex no solamente ta bon, sino HOPI importante. Pasobra solamente sex ta ofrece e nivel di intimidad necesario pa mantene e coneccion y e chispa den e relacion y preveni cu un relacion romantico poco poco ta caba na nada. Sin sex, cu paso di tempo no lo resta nada mas cu un ‘roommate-relationship’ of un partnership financiero/social, locual ta alimenta e riesgo, cu un of ambos lo bay busca intimidad pafo di e relacion. 
… mi kier enfatisa cu sex no solamente ta bon, sino HOPI importante.”

Hopi bes e pregunta ta surgi: cuanto biaha pa siman ta normal? Aunke personalmente mi no ta gusta defini un bon relacion sexual a base di cantidad, sino a base di calidad, mi por bisa cu, segun estudionan, un minimo di un biaha pa siman ta wordo considera como normal. Pero locual ta ‘normal’ ta diferente pa tur hende y ta depende mas bien di expectativanan propio. Factornan manera, por ehempel, intensidad di e encuentro, e nivel di pasion, deseo, excitacion, orgasmo y satisfaccion sexual tambe ta hunga un rol.
Desiree Swaen02
Love Coach Desiree Swaen. Potret: Ayrton Tromp

Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook