Advertise on BonPaSa.com
Advertise on BonPaSa.com

Gaslighting: tactica di manipulacion

(Reading time: 3 - 5 minutes)

couple picture eye to eye
Despues di a splica e peliger di ta den un relacion cu un narcista, Love Coach Desiree Swaen ta duna un splicacion di un di e tacticanan di manipulacion cu narcista, abusado y hasta dictador ta usa: gaslighting.
 


“Bo ta loco.” “Ta otro hende bo kiermen, no ami.” “Bo ta wak spirito.” “No ta ami bo a wak.” “Bo no ta corda kico bo a bisa?” “Stop di haci ridiculo.” “Bo ta demasiado emocional.” “Locual bo ta pensa ta absurdo.” “Bo ta abnormal.” “Tur ora bo ta exagera.” “Ami nunca a bisa esey.” “Bo ta imagina cos.” “Stop di ta dramatico.” “Bo no ta bon.” “Bo ta corda cos robes.” “Bo ta demasiado insigur.” “Stop di altera pornada.”

Esaki ta zona familiar? Esakinan ta tactica di manipulacion mental caracteristico pa dictadornan, lidernan di secta, narcistanan y abusadonan. E ta un forma di abuso mental cu ta wordo yama “Gaslighting”. E nomber ta deriva for di e obra di teatro di 1938 yama “Gas light” cual a wordo produci y presenta den forma di pelicula na aña 1944. Den e storia aki un homber ta asesina un muhe y ora su casa a cuminsa cuestiona su actuacionnan despues di e asesinato, e ta manipula e casa di tal forma, cu na cierto momento e casa ta cuminsa kere cu e ta birando loco. E termino ‘gaslighting’ como forma di manipulacion ta wordo uza desde añanan ‘60.
gaslight 1944
Escena di e pelicula Gaslight (1944): Charles Boyer y Ingrid Bergman den e ultimo confrontacion. 

En corto, gaslighting ta encera e acto di haci of bisa cosnan pa sembra duda den un persona of miembronan di un grupo, cu e meta di pone nan cuestiona nan propio memoria, percepcion of estado mental. E ‘gaslighter’ ta gaña y ta nenga di a bisa of a haci algo, a pesar cu bo tin prueba di esaki. E ta bisa un cos y despues haci otro. No solamente locual e ‘gaslighter’ ta bisa ta relevante, pero tambe su accionnan relaciona cu locual e ta papia, cu ta inclui, entre otro, cambia cos for di luga, sconde cos, y elimina evidencia.
Asina e ta confundi’bo y tene’bo den un duda constante tocante su intencionnan y hasta ta pone’bo sinti bo mes culpabel pa pensa cos cu ‘no ta klop’.” 

Den relacionnan sentimental, e accionnan ta cuminsa na un manera hopi subtil, y pa e motibo ey bo no ta ripara na prome instante. Nan por hasta zona sinceramente preocupa y capaz di puntra’bo si di berdad bo no ta corda algo y bisa’bo cu bo mester ‘slow down’, kisas bo ta demasiado druk y p’esey bo ta lubida. Pues e ta cuminsa na manera fini y e ta varia tambe. E gaslighter cu ta caba di yama’bo pa kens, por bira duna’bo un compliment pa un super bon idea cu bo a cont’e algun dia pasa. Asina e ta confundi’bo y tene’bo den un duda constante tocante su intencionnan y hasta ta pone’bo sinti bo mes culpabel pa pensa cos cu ‘no ta klop’.
Di experiencia propio como victima di gaslighting, y tambe como coach, mi conseho pa esnan cu ta reconoce esaki den nan pareha, ta: Take back your power.” 

Un relacion cu un gaslighter ta un relacion sumamente toxico, cu a lo largo por hiba’bo den direccion di ansiedad, depresion, of otro problemanan mental, pa motibo cu bo ta bay kere cu en berdad bo tin un problema grave, cu ta parce di no tin solucion. Di experiencia propio como victima di gaslighting, y tambe como coach, mi conseho pa esnan cu ta reconoce esaki den nan pareha, ta: Take back your power. E persona aki kier eherce poder riba bo door di laga’bo sinti’bo mentalmente zwak y inferior. Deep down, bo sa esaki. Bo sa cu bo no ta loco. No sigui permiti esaki. Pone un paro definitivo na manipulacion. Corta e relacion aki na su raiz. No lo ta facil. E ta tuma curashi, pero e decision pa salba bo mes ta den bo man. Pidi ayudo si ta necesario. Tuma control bek di bo bida y bo salud mental.

Abo tawata den relacion cu un gaslighter? Si ta asina, sinti’bo liber pa comparti bo experiencia, entre otro cosnan cu e tawata haci of bisa, y kico finalmente a pone’bo tuma e curashi pa caba e relacion. E intencion ta pa conscientisa otronan y laga nan sinti cu nan no ta nan so, y cu semper tin un solucion.

Desiree Swaen01
Love Coach Desiree Swaen. Potret: Ayrton Tromp

Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook