Advertise on BonPaSa.com
Advertise on BonPaSa.com

Pakico ta celebra Dia di Rey?

(Reading time: 4 - 7 minutes)

dia di rey famia real hulandes 02 Tur aña na april, Reino Hulandes ta celebra Dia di Rey. Pero den pasado e dia di fiesta aki tawata tin otro nomber: aña di la Reina y Prinsessedag. Kico ta e historia di e celebracion aki? Y pakico nos ta celebr'e?

Aruba ta forma parti di un reino. Cada reino tin su rey of reina na mando y un ‘famia real.’ Mescos cu na mayoria di pais cu un monarkia, cu tempo e hefe di e monarkia Hulandes a perde su funcion como un soberano y awendia ta sirbi mas bien un funcion ceremonial. Segun e grondwet y statuut di Reino Hulandes, ta e rey ta hefe di gobierno di reino, pero den practica esaki ta e minister president di Hulanda.

Kico ta un cas real?
Den su esencia, un cas real, ta basa riba e concepto cu cierto famianan, pa medio di nan lineahe, tin derecho di ta hefe absoluto di un of mas teritorio. E lineahe tabata wordo mira como superior, y p’esey pa siglos, reynan y prinsnan mester a casa cu otro prinses of muhe cu tambe tin sanger real of cu nan famia tin un titulo di "noble".

Pa keda na poder y expande influencia, de bes en cuando un monarca por a expresa su gratitud door di regala un bon sirbiente un titulo di "noble" di por ehempel Marquis, Baron, Condado etc. y varios teritorio pa e maneha. Di e forma aki e grupo di famianan real y noble por a sigui crece, na mes momento creando dos clase di persona: clase noble y e masa.

Tambe ta posibel pa un persona tin varios titulo di diferente gradacion. Un ehempel di practica; Rey Willem-Alexander su nomber completo ta lo siguiente: Willem-Alexander Claus George Ferdinand van Oranje-Nassau caminda cu e fam 'van Oranje-Nassau'  ta referi na su dinastia. 

Y su titulonan ta:
  • Prins der Nederlanden (esaki ta cay afo tanten cu e ta Rey)
  • Prins van Oranje-Nassau.
  • Jonkheer van Amsberg.
  • Koning der Nederlanden
  • Markies van Veere en Vlissingen
  • Graaf van Katzenelnbogen, Vianden, Diez, Spiegelberg, Buren, Leerdam en Culemborg
  • Burggraaf van Antwerpen
  • Baron van Breda, Diest, Beilstein, de stad Grave, het Land van Cuijk, IJsselstein, Cranendonck, Eindhoven, Liesveld, Herstal, Waasten, Arlay en Nozeroy
  • Vrijheer van Ameland
  • Heer van Borculo, Bredevoort, Lichtenvoorde, Loo, Geertruidenberg, Klundert, Zevenbergen, Hooge en Lage Zwaluwe, Naaldwijk, Polanen, Sint-Maartensdijk, Soest, Baarn, Ter Eem, Willemstad, Steenbergen, Montfort, St. Vith, Bütgenbach, Niervaart, Dasburg, Turnhout, Besançon.
dia di rey willem alexander
Si Aruba tabata tin famianan real, e ora por ehempel Juancho lo por ta rey di savaneta, marquis di Tanki Leendert y baron di e teritorionan di Bubali Plas. Juancho lo pasa e titulonan aki pa su yiunan y su yiunan lo pasa e titulonan aki pa nan yiunan. 

Coincidencia?
Maxima Zorreguieta tambe tin lineahe di "noble" y hasta tin un ancestro en comun cu Willem-Alexander; e "noble" Aleman Pieter Halbach (1634-1886). Halbach su yiu Gaspar (1673-1723) ta ancestro di Matilde Halbach (1823-1848) cu ta wela di Prins Bernard. Similarmente, un otro yiu, Pieter Halbach (1668-1753) ta ancestro di Pablo Halbach, kende ta welo di Maxima Bonorino cu ta bisabuela di Maxima Zorreguieta.

Ta asina cu ora e famia Halbach a yega Argentina, nan a mezcla cu e famia "noble" Spaño Bonorino Gonzalez Islas y Ladron de Guevara. E famia Zorreguieta ta "noble" di Pais Basco (Spaña) y a yega Argentina na 1777.  dia di rey maxima zorreguieta Sosten pa famia real Hulandes
E concepto di un rey of reina cu ta hefe absoluto di su teritorio ta uno cu den practica casi no ta existi mas, cu excepcion di por ehempel Vaticano, Brunei, eSwatini (Swaziland), Saudi Arabia y Oman y den cierto aspecto United Arab Emirates (UAE) cu ta mas bien un federacion consistiendo di shete monarkia absoluto.

Rond mundo famianan real a perde nan poder y awo ta mastanto "celebridad." Nan ta fungi como embahador, nan ta participa den mision di comercio y pa mayoria di ciudadano nan ta fungi como un factor cu ta trece union y fortifica e identidad Hulandes. 

Sea ta pa motibo di custumber y tradicion, pa un sentido di escape di bida diario, of pa e status di "celebridad" cu nan tin, mayoria di hende na Hulanda ta gusta e idea di tin un cas real y un monarca. Segun e Koningsdagenquete 2017, 70% di Hulandesnan (na Hulanda) ta sostene e monarkia sea den su forma actual of den un forma mas ceremonial y solamente 13% kier elimina e monarkia y reemplasa esaki cu un republica.  

Otro aspecto cu pueblo tin derecho di tene na cuenta ta e costo di un monarkia. E famia real di Hulanda ta costa pueblo Hulandes 345 miyon euro (mas o menos 750 miyon florin) pa aña si tene cuenta cu construccionan financiero, costo di siguridad, mantencion di palacio, organisa evento etc. dia di rey willem alexander y maxima zorreguieta

Prome cu Willem Alexander a bira rey na 2013, Reino Hulandes nunca a celebra un Dia di 'Rey.' E celebracion aki semper tabata honra monarcanan femenino. Lesa siguientemente un tiki mas di e historia di e dia aki: 

Prinsessedag
E historia di e celebracion aki ta bay bek na final di siglo 19. Riba 31 augustus 1885, a celebra ‘Prinsessedag’ pa prome biaha na Utrecht. Prinsessedag a wordo organisa pa celebra e di cinco cumpleaño di prinses Wilhelmina. E celebracion aki tawata iniciativa di un corant local na Utrecht. A organisa esaki cu intencion di fortifica Hulanda su identidad nacional.

Prome cu Prinsessedag ya tawata tin actividad pa celebra e cumpleaño di Wilhelmina, pero esaki tawata prome biaha cu a categorisa tur actividad bou di e mesun nomber di Prinsessedag.

Koninginnedag
Ora cu rey Willem III a fayece na november di 1890 na edad di 73 aña, su sucesor prinses Wilhelmina, cu apenas 10 aña, automaticamente a bira reina di Reino Hulandes. Pues e aña siguiente, na 1891, embes di celebra Prinsessedag, a cuminsa celebra Koninginnedag.

Tin cu bisa si, cu oficialmente, Wilhelmina cu su edad hoben di 10 aña no por a wordo corona. Pues su mama, prinses Emma, a fungi como regente te ora cu Wilhelmina a yega e edad di 18 aña. dia di rey wilhelmina arubaWilhelmina a nace 31 di augustus 1880 y a bira reina dia 23 november 1890. Su reinado a dura te cu 4 september 1948. Su coronacion a tuma luga 6 september 1898, na edad di 18 aña.

 

Juliana y Beatrix
Riba 4 di september 1948, despues di casi 58 aña como reina, Wilhelmina a abdica su trono. Na e momento ey, su yiu muhe, prinses Juliana, a asumi e cargo di reina. Mirando cu cumpleaño di Juliana tawata 30 di april, a dicidi di hala e celebracion anual pa e dia aki. Pues desde 1949 Koninginnedag a wordo celebra riba 30 di april na luga di 31 di augustus. Beatrix su cumpleaño ta 31 di januari. Pero ora cu prinses Beatrix a wordo corona como reina na 1980, el a dicidi di mantene e fecha di 30 di april como Koninginnedag.

Willem-Alexander
Na aña 2013, yiu homber di Beatrix, Willem-Alexander a asumi e posicion di rey di Reino Hulandes. Tumando na cuenta cu Willem-Alexander ta masculino, a dicidi di cambia e nomber di e festividad pa Koningsdag. Tambe a dicidi pa cambia e fecha, di 30 di april pa e fecha di cumpleaño di Willem- Alexander, cual ta 27 di april. Na 2014, e prome Koningsdag a wordo celebra den Reino Hulandes.