Advertise on BonPaSa.com
Advertise on BonPaSa.com

5 tip pa baha bo costo di bida

(Reading time: 3 - 5 minutes)

Florin
Aumento di costo di bida por afecta nos tur. Cuanto e ta afecta'bo, ta varia entre otro dependiendo di bo situacion financiero y estilo di bida. Pa cambia e costo di bida en general, no ta facil. Pero si tin cosnan relativamente facil cu nos por haci pa cambia nos costo di bida personal.
 

Calcula prijs den ora di trabou en bes di den placa

Pa realisa e balor di bo tempo, y alabes pa yuda'bo realisa e prijs real cu bo ta pagando pa un producto of servicio, calcula cuanto ora bo tin cu traha pa por paga pa e producto of servicio en cuestion. Por ehempel, si bo ta gana Afl. 20,- pa ora, y bo kier cumpra sapato di Afl. 140,- (incluyendo BBO, etc.), bo tin cu traha 7 ora pa por cumpra e sapatonan. Esey ta 7 ora cu bo no lo haya bek nunca mas. Asina bo por evalua si cumpra e sapato no ta solamente bal bo placa, pero tambe bo tempo. E manera aki di calcula por resulta den menos gastamento di placa inecesario.
 

Cushina

Un di e gastonan mas obvio cu por mitiga, ta e gastonan di come afo (restaurant, take-away). E prijsnan entre diferente restaurant ta varia hopi. Pero generalmente, cushina bo mes no solamente lo costa'bo menos placa, pero tin bon chens cu bo lo come mas saludabel tambe. Hasta si e diferencia entre come afo of cushina bo mes no ta hopi pa dia, e lo ta un suma significante si bo tum'e pa luna. E diferencia facilmente ta yega na algun cien Florin pa luna.
 
Un otro gasto cu por haci hopi diferencia, ta gasto riba bebidanan alcoholico. Dependiendo di unda y kico bo ta bebe, algun drinks pa siman por costabo algun cien Florin pa luna. Y ora di come den un restaurant, e diferencia riba e cuenta por ta drastico si bo pidi solamente bebidanan sin alcohol. 
 

Baha gastonan periodico

Scrutina tur bo gastonan periodico, manera bo gastonan di utilidad, telefon, internet, cable, banco y seguro. Kisas bo no por spaar mucho riba nan individualmente, pero diferencianan chikito por acumula y yega na un suma significante. Por ehempel, si bo por reduci bo gastonan mensual di coriente y awa (hunto) cu 15 Florin, di telefon/data cu 15 Florin, gastonan bancario cu 5 Florin, y di seguro cu 15 Florin, bo lo scapa 600 Florin den un aña.
 

No fia si no mester

Na Aruba, y hopi otro pais, ta mustra di tin un cultura di debe. Si antes mastanto tawata fia solamente pa paga pa un auto y un cas, awendia hende ta fia pa un cantidad di producto of evento (carnaval, vacacion). Sea ta fia placa pa bay cumpra/paga algo, of ta cumpra algo riba credito. Un di e problemanan di esaki, ta e interes. Pa ora bo caba di paga, bo a paga (hopi) mas cu e balor di loke bo a cumpra. Especialmente si e interes ta ridiculamente halto, cual sa ta e caso na Aruba. 
 
Banda di e aumento di gasto pa motibo di interes, tambe bo ta aumentando bo gastonan periodico, cual ta laga'bo cu menos placa pa haci y cumpra otro cos, of spaar. Tambe sa pasa cu loke bo a cumpra ta daña prome cu bo a caba di paga p'e. 
 
Considera spaar pa loke bo kier cumpra prome. Tambe considera si e producto no ta mucho caro pa bo situacion financiero, y si no ta mas responsabel pa, por ehempel, cumpra un modelo mas barata. Esaki ta hiba nos na e siguiente tip:
 

Biba segun bo presupuesto

Imagina'bo cu bo ta cumpra un auto cu ta basta caro considerando bo salario y situacion financiero. Pero ya, bo kier e auto ey y bo a fia (casi) e maximo cu banco kier fia'bo. Bo a considera cu piesanan pa e auto mas caro tambe lo ta mas caro? Bo a pensa cu e seguro por ta mas caro? E motor mas grandi ta gasta mas gasolin? Bo a cumpra e auto mas caro djies pa otro hende wak bo aden? Esey ta un bon motibo pa sobra menos placa pa tur bo otro gastonan? 
 
E aspectonan aki tambe ta relevante pa un hipoteca pa cas. Tin bo propio cas (un asset) tin su beneficionan. Pero ta bale la pena pa fia e maximo cu banco kier fia'bo y cumpra e cas mas grandi cu bo por paga? Bo lo sobra suficiente placa pa haci/logra otro cosnan cu bo kier haci/logra? E hipoteca ta bay mara'bo na biba 'paycheck to paycheck' pa hopi aña? Bo a considera cu grondbelasting, seguro y mantencion di un cas mas grandi probablemente lo ta mas caro, pues aumentando bo futuro gastonan mas hopi? 
 
No keda sin realisa e balor di sobra placa tur luna y por spaar, haci inversion y biba financieramente comfortabel. Na final di dia, finansa personal no ta bay pa cuanto placa bo tin, pero con largo bo por mantene bo estilo di bida cu e placa cu bo tin.