Advertise on BonPaSa.com
Advertise on BonPaSa.com

Monogamia y fidelidad

(Reading time: 2 - 4 minutes)

couple
Monotonia: un relacion den cual e pareha parce mas bien un ruman of bon amigo. Falta di deseo, falta di aventura, falta di sorpresa, falta di novedad, etc., ta aspectonan cu mayoria di relacion di termino largo lo experiencia na cierto momento. 
E disgusto ta escala, ora comunicacion honesto y abierto cu e pareha no ta produci e resultadonan desea. Represion y resentimiento ta crece y bira manera un volcan cu por explota na un momento of otro. Y pa algun hende, e erupcion aki ta bin den forma di un infidelidad cu nunca nan por a pensa di comete. 
 
E contesta riba e pregunta “Pakico?” ta varia di persona pa persona. E tendencia actual ta: “Si mi pareha no dunami exactamente locual ami kier, mi tin derecho di busca mi felicidad pafo di e relacion.” 
Hopi biaha e raiz di e problema ta comunicacion. Varios hende ta tene nan deseonan pa nan mes, pa evita confrontacion. Ora puntra nan: “Bo a papia cu bo pareha tocante e deseo particular aki pa mira si e lo ta dispuesto?” mayoria biaha e contesta ta: “No, pasobra mi pareha nunca lo bay di acuerdo.” Pues, nan no ta ni duna e oportunidad na e pareha pa considera e idea, of pa cambia di un opinion vocifera den pasado. Ta scoge infidelidad como un forma di escape, y ta hustifica esaki, bisando cu nan no kier ‘hurt’ nan pareha y p’esey ta busca nan propio solucion. Mientras e pareha no sa, tur cos ta mustra perfecto. Na momento cu esaki wordo descubri, di un banda nan ta sinti remordimento, pero di otro banda nan ta resenti nan pareha, implicando cu e pareha mester por a ripara locual tawata falta. 
Ta scoge infidelidad como un forma di escape, y ta hustifica esaki, bisando cu nan no kier ‘hurt’ nan pareha y p’esey ta busca nan propio solucion.” 

Monotonia sexual ta un di e factornan cu ta hunga un rol, pero tin hopi mas cos, manera negligencia, falta di amor, falta di romance, falta di atencion, falta di aprecio, falta di detaye, etc., cu na cierto momento ta cuminsa afecta e bida di pareha.   
Ta bon pa mira esaki di tur dos banda. 
Tin hende cu si ta expresa nan mes y cu ta pidi na diferente ocasion y den diferente forma, pa cooperacion y no ta haya esaki. Un relacion ta ‘geven en nemen’. Monogamia ta exigi esfuerso mutuo. Mester cuminsa na comunica abiertamente tocante e deseonan di ambos persona. Y mester tin tambe e disponibilidad pa complace cu cosnan cu kisas pa’bo no ta importante, pero pa bo pareha si. Flexibilidad ta crucial den esaki. Nos no por biba cu e expectativa cu nos pareha lo keda semper mescos cu tempo nos a conoce. Cu paso di tempo, hende por cambia, necesidadnan por cambia y custumbernan tambe. 
Nos no por biba cu e expectativa cu nos pareha lo keda semper mescos cu tempo nos a conoce.” 

Claro, cu tin cosnan cu pa nos pareha lo keda inaceptabel y no por fors’e pa haci cosnan contra di su principio. Den e caso ey, ta keda na abo pa evalua kico ta pisa mas: locual bo ta sinti cu bo falta den e relacion, of e otro cosnan cu si ta na bo agrado. 
Evita di tuma desicionnan emocional of abrupto. Semper pensa riba tur locual bo tin y cuanto tempo y esfuerso a costa’bo pa logr’e, y purba imagina’bo con bo lo sinti si tur esaki bay perdi. 
 
Desiree Swaen01
Love Coach Desiree Swaen. Potret: Ayrton Tromp

Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook