Advertise on BonPaSa.com
Advertise on BonPaSa.com

Efectonan di solo riba bo salud

(Reading time: 2 - 4 minutes)

solo
Rayonan di solo tin varios efecto riba nos salud.  Tin di nan ta hopi visibel, mientras otro efectonan ta tuma tempo pa bira visibel. E hecho cu Aruba ta serca di e equator, ta haci cu rayonan di solo ta yega na un angulo di casi 90 grado. Na e angulo aki, e rayonan ta mas concentra. Pues bibando serca di equator ta un bon motibo pa tene bon cuenta cu e efectonan di solo riba bo salud. 
 

Vitamina D

Nos curpa por produci vitamina D door di expone nos cuero na rayonan di solo ultravioleta (UV). Vitamina D ta saludabel y ta yuda, entre otro, cu absorbacion di calcium. No ta tuma hopi tempo den solo pa percura pa e beneficio aki. Mientras cu pasa un tiki tempo den solo ta saludabel, mucho solo tin varios efecto negativo pa bo salud. 
 

Cuero 

Luz ultravioleta (UV) di solo ta trece daño na fibranan (elastin) den bo cuero. E efecto di esaki ta cu bo cuero ta bira menos strak, perdiendo su elasticidad. E daño tambe ta causa cu lo tuma mas tempo pa bo cuero cura despues di un herida. Daño na e fibranan di bo cuero por tuma hopi tempo pa bira visibel. Kisas bo no lo ripara e daño ora e tuma luga, pero na un edad mas avansa e consecuencianan ta bira visibel y por pone bo cuero mustra relativamente bieu pa bo edad. Banda di reduci e elasticidad di bo cuero, rayonan UV tambe por causa lashi, mancha (descoloramento na cierto area), y cancer di cuero. 
Cancer di cuero ta e tipo di cancer mas diagnostica na Aruba.”

Cancer di cuero ta e tipo di cancer mas diagnostica na Aruba (promedio di 109 diagnostico nobo pa aña segun Directie Volksgezondheid). Cancer di cuero ta un crecemento incontrola di cel di cuero abnormal, cual por resulta den tumor. Tin diferente tipo di cancer di cuero. Cierto tipo usualmente por wordo trata bon, mientras cu otro tipo ta entre e cancernan mas mortal cu bo por haya.  
Tur hende por haya cancer di cuero. Esnan cu un color di cuero scur (mas melanina) tin menos riesgo di haya cancer di cuero, compara cu esnan cu un color di cuero cla. Esaki no kiermen cu un persona cu cuero color scur no tin cu proteha su mes for di solo.  sunblockTip:
  • Usa un bon sunblock (riba SPF 30) y corda pa re-aplica esaki debidamente.
  • No expone bo cuero mucho largo na solo.
  • Tapa bo cuero cu paña y proteha bo cara cu un petchi of sombre.
  • Si bo mester ta den solo pa un tempo largo, por ehempel pa bo trabou, purba di duna bo cuero un ‘pauze’ di e solo door di busca sombra cada tanto rato.
  • Tene extra cautela cu baby y mucha, considerando cu nan cuero ta mas sensitivo.
 

Wowo 

Rayonan ultravioleta por causa diferente daño na bo wowo. E por kima e 'capa' di bo wowo, por haci bo bista bira wazig y tambe por causa catarata.
 
Tip: sea cauteloso cu bril di solo cu no ta blokia rayonan ultravioleta (UV). Ora bo bisti un bril di solo, bo pupil di wowo ta bira mas grandi pa motibo cu e bril di solo ta laga menos luz yega na bo wowo. Si na mesun momento e bril di solo no ta blokia rayonan UV, mas di e rayonan aki ta drenta door di bo pupilnan (cu a bira mas grandi pa motibo di tin e bril di solo bisti), aumentando e posibel daño na bo bista.  sunglasses

Immuunsysteem 

Rayonan di solo tambe tin consecuencianan menos spera. Celnan di sanger blanco ta hopi importante pa nos immuunsysteem. Ora bo cuero kima, e celnan blanco ta yuda bo cuero recupera. Esaki por reduci e proteccion cu e celnan aki por percura p’e den otro areanan di bo curpa, pues reduciendo e resistencia di bo immuunsysteem (weerstand), resultando den vulnerabilidadnan pa bo salud.