Cu tanto diferente suplemento riba mercado, ta bon pa sa cua suplementonan dokter ta considera esunnan esencial. E siguiente seleccion di suplemento ta wordo recomenda door di e conocido Dr. Oz (Mehmet Oz, cirujano cardiotorácico, professor na Columbia University y presentador di The Dr. Oz show).Tene na cuenta cu suplementonan no ta un substitucion pa come saludabel. Tambe tene na cuenta cu suplementonan por interveni cu efectonan di cierto medicina. Semper consulta cu bo dokter prome cu bo cuminsa tuma un suplemento nobo.
Multivitamina
E prome suplemento cu Dr. Oz ta recomenda ta un multivitamina. Percura pa bo multiviamina contene vitamina A, C, D, E y K. Tambe percura pa e contene potassium, zinc y iodine.
E multivitamina mester contene 100% di bo necesidad diario di mayoria vitamina. Evita "mega-multivitamina" cu ta contene nivelnan demasiado halto di vitamina y mineral.
Extra tip: pa maximalisa absorbacion di e vitamina y mineralnan, split bo multivitamina den dos y tuma un mita mainta y e otro mita atardi.
Omega-3
Omega-3 fatty acids ta bon pa bo curazon, bo celebro y bo joints (articulacionnan). Si bo ta come suficiente pisca y pinda, posiblemente bo ta consumiendo suficiente omega-3 caba. Ta wordo recomenda pa tuma 600 mg di DHA, cual ta e tipo di omega-3 cu bo kier (segun dr. Oz). Bo por haya esaki den fish oil por ehempel.
Calcium y Magnesium Calcium ta yuda tene bo weso y djentenan fuerte y ta yuda cu funcionamento di bo musculo, adernan y sistema di nervio. Dr. Oz ta recomenda pa tuma 600 mg di calcium hunto cu 400 mg di magnesium (magnesium por yuda preveni efectonan di constipation di calcium). Calcium por afecta absorbacon di otro vitamina, pues no tum’e dentro di 1-2 ora di tuma bo multivitamina.
Vitamina D
Na Aruba ta facil pa haya suficiente vitamina D, simplemente door di expone bo cuero na e rayonan di solo. Tene cuenta cu e solo fuerte tambe por ta peligroso pa bo cuero. Pa esnan cu no ta haya suficiente solo, dr. Oz ta recomenda pa tuma esaki como suplemento (1.000 IU). Vitamina D ta yuda cu absorbacion di calcium, ta bon pa bo wesonan, ta yuda preveni osteoporosis y posiblemente tambe ta yuda preveni cierto tipo di cancer.
Folic Acid (vitamina B9)
Damanan, si tin un chens cu bo por sali na estado, ta recomenda pa tuma folic acid. E ta proteha contra fayonan den crecemento for di cuminsamento di un embaraso caba. Banda di e beneficionan pa esnan cu tin chens di sali na estado, folic acid ta wordo recomenda pa motibo di su efecto riba creacion di DNA y celnan di sanger cora. Bo por consumi suficiente di e vitamina aki door di come suficiente berdura. Mayoria multivitamina tambe ta contene folic acid. Pa esnan na estado ta wordo recomenda pa tuma 400 pa 800 microgram adicional diariamente. Consulta cu bo dokter!
