Nos ta traha pa biba of biba pa traha?

Dia 1 di mei ta celebra dia di obrero, un bon ocasion pa reflecciona riba pasado y presente pa asina por enfoca riba futuro. Ta parce cu e afan di sociedad pa mas y mas abundancia a bira algo normal y productividad semper tin prioridad. Tempo a bira un comodidad valioso cual nos debe nos mes. Siguientemente lo elabora riba e tema outsourcing personal, productividad y prosperidad.

Na 1930 e economista John M. Keynes a pronostica cu pa 2030 nos tur lo bay traha 15 ora pa siman. Door di aumento di prosperidad y productividad nos lo por “cumpra mas tempo pa nos mes” segun Keynes. Keynes tabatin parcialmente rason. Na Merca por ehempel den añanan 1930 trahadonan tabata traha promedio 48 ora pa siman. Na 1970 esaki a baha net rond 40 ora pa siman. Avansenan tecnologico a hasi economia hopi mas productivo, pero e desaroyo di ultimo 4 decenia den aumento di productividad no a wordo converti den menos ora di trabou. Dicon? Porta paso nos a bira mas y mas materialista y nos nunca ta satisfecho cu locual nos tin, pesey semper tin necesidad na mas placa pa asina cumpra mas. Of ta paso costo di bida a bira mas halto of ta paso desigualdad a crese ultimo decenianan, locual ta hasi imposibel pa esnan cu menos recurso traha menos. Traha menos of mas, con esaki ta regla na Aruba?

Desde 1952 e 8 ora di trabou pa dia a wordo ancra den ley, esta e “arbeidsregeling” 1952. Articulo 5 di e ley ta prohibi pa un trahado traha mas largo cu 8 ora pa dia y mas largo cu 45 ora pa siman. Di e manera aki a sa di realisa un balansa mas ideal cual ta 8 ora traha, 8 ora relaha y 8 ora drumi. Na 1951 trahadonan di refineria Lago a bay den welga (manera e potret aki riba ta ilustra). Por medio di accion colectivo trahadonan a boga pa baha e orario laboral y cu exito. Pues sin lucha no tabatin victoria. Despues di añanan e ley a wordo ahusta na varios momento, na e necesidad di demanda di trabou. Asina por desvia di locual ley ta stipula por medio di “arbeidsbesluiten” cual ta e caso pa entre otro horeca y casino, caminda por traha mas cu 40 ora pa siman. Tambe claro a bini ahustacionnan pa proteha e clase trahado, por ehempel cu ta traha “nachtdienst” of riba “standby”.

Traha 8 ora pa dia ta algo cu nos tur a accepta. Apesar cu e balansa ta parce ideal asina mes nos ta sinti nos mes hopi biaha cansa, nos ta perde focus na trabou y tur siman nos ta pura p’e dia liber yega. Hopi estudio ta adverti cu no ta saludabel pa traha mas cu 8 ora pa dia, toch hopi di nos ta traha 50 ora pa siman of te hasta mas. Actualmente Suesia ta experimentando cu 6 ora di trabou pa dia y trahado ta mantene su salario di 8 ora pa dia. E objetivo ta pa stimula empleo, hisa eficiencia na pia di trabou, baha absentismo y por lo general contribui na e bienestar di e trahado. Te awo e resultadonan ta hopi prometedor. Trahadonan tin mas energia paso nan a logra descansa mas, nan ta mas contento paso nan tin mas tempo pa nan mes.Sinembargo un posibel riesgo por ta cu e trahadonan lo bay tuma 2 trabou di 6 ora en bes di usa e tempo pa locual e concepto aki a wordo inicia.

Remarcabel ta cu Hulanda y Alemenia ta e dos paisnan na mundo caminda menos ora ta wordo traha pa persona pa aña, un promedio di 1.400 ora , siendo Sur Korea, Grecia y Mexico ta score mas halto cu alrededor di 2.000 ora di trabou pa persona pa aña, segun data di OECD. Pero productividad na Alemania y Hulanda ta 70% mas halto, pues ilustrando cu productividad no ta wordo determina solamente pa cantidad di oranan traha. E concepto cu e trahado cu por eherce su trabou mas modera, finalmente lo produci mas, no ta nada nobo, e famoso filosofo Adam Smith ya a bin na e mesun pensamento aki na 1776.

Apesar di ta mas productivo awendia, toch nos no ta trahando menos pa asina tin mas tempo pa dedica na nos yiunan, nos grandinan, nos famia, amigonan, pa practica un deporte, hobby of simplemente descansa. Consecuentemente, den nos tempo liber nos ta prefera di kita tareanan personal for di man. Esey a crea un demanda na varios tipo di trabou cu antes nos mes tabata hasi manera: cushina, laba auto, strika y laba paña. Esey por splica e tantisimo take aways, snack truck, laundry y tent di car wash. Basicamente nos ta outsource nos tareanan personal contra pago.

Outsourcing personal no ta un concepto nobo, pero ta algo cu ta bay hopi bek den tempo. Outsourcing den literatura classico ta referi na un shift di trabounan di paisnan desaroya manera Merca pa paisnan den desaroyo manera Mexico, India, China, Myanmar y Bangladesh, caminda e costo di produccion ta mas abou. Outsourcing personal, segun e sociologo Arlie Hochschild den su buki titula: The Outsourced Self, ta tur tareanan personal y intimo cu antes tabata wordo hasi door di nos mes, awendia ta wordo comercialisa. Ehempelnan di outsourcing personal ta limpia cas, plania casamento (weddingplanner), organiza fiesta (partyorganizer), educacion di yiu y cuido di nos grandinan.

Outsourcing personal tawata antes algo reserva pa solamente e clase mas elite cu por a permiti esaki. Awendia nos sociedad moderno ta ofrese mas posibilidad, caminda mas servicionan specialisa ta disponibel y mas pagabel. No kiermen cu tur hende por paga pa delaster un servicio, e upper y middle class semper bay tin acceso na un scala di servicio paga, caminda esnan cu menos recurso tin dificultad pa permiti esaki. Un bentaha di outsourcing personal ta e creacion di trabounan na tur nivel, di un personal coach den gym pa un trainer pa bo cacho stima, pero kico a contribui na e shift aki? Ta unicamente prosperidad? Of ta participacion di nos hende muhernan den forsa laboral? Emancipacion di hende muher sigur a hunga un rol importante den desaroyo aki. Segun data di CBS di 2010, 59.3% di hendenan muher den “working age” a forma parti di nos forsa laboral siendo na 1960 esaki tabata 25.7%. Por conclui cu antes e hende muher por a dedica mas tempo na tareanan den e hogar, mientras awendia cu tin mas hende muher participando na e forsa laboral ya no tin mesun tanto tempo disponibel pa haci e tareanan personal.

Un cos ta sigur, desde 1930 te cu awo nos no a logra converti prosperdidad y aumento di productividad den menos ora di trabou manera Keynes a pronostica. Costo di bida na Aruba ta halto, esey ta hasi cu pa gran parti di nos ciudadanonan no tin escohencia pa traha menos, ni menciona e “bestaansminimum” cu no ta den equilibrio cu sueldo minimo. Un otro motibo ta cu nos hendenan ta hopi orguyoso, materialista y hopi biaha ta hiba un standard di bida mas halto di locual cu por permiti. Semper bay nos kier lusi, nos kier e ultimo “gadget” y hopi biaha nos no ta satisfecho cu locual nos tin. Basicamente nos a bira victima di consumismo.

Por conclui cu nos no a logra traha menos, pero si a logra di outsource varios tareanan personal pa asina crea mas tempo liber. Por menciona haci uso di servicionan di laundry, cumpra cuminda afo y laga otro hende laba nos auto pa nos. Tambe nos ta laga otro hende cuida di nos mayornan ora nan bira grandi di edad y nos ta laga otro hende wak pa nos yiunan. Apesar cu servicionan a bira mas pagabel toch esunnan cu por disfruta di mas tempo pa nan mes, ta esnan cu por permiti outsource mas cos. Tanten servicionan ta keda pagabel, outsourcing personal ta funciona, pero si wak desaroyonan manera na Hulanda por ehempel lugarnan pa cuido di hende grandi no ta sostenibel mas, cual ta bayendo a costo di nivel di cuido di e ancianonan cual no ta acceptabel. Kisas mester bin un debate riba un otro alternativa pa crea mas tempo pa por dedica na nos mes, esta e posibilidad di traha 6 ora pa dia sin entrega salario manera ta e caso na Suesia. Claro no por compara paisnan Escandinavia cu Aruba pero tin varios indicacion cu traha menos ora pa dia ta conduci na mas productividad.

Contrario di outsourcing personal, traha menos ora pa dia lo benificia tur hende den comunidad, di esnan cu entrada mas halto pa esunnan cu sueldo minimo. Di e manera aki mayoria di nos por yega na un balansa mas ideal entre un banda e afan pa mas y mas abundancia y di otro banda mas tempo valioso pa nos mes. Basicamente, traha pa biba en bes di biba pa traha.

Autor: Igmar Reyes