Advertise on BonPaSa.com
Advertise on BonPaSa.com

Pakico abo mester spaar placa

(Reading time: 2 - 4 minutes)

spaar placa
Sea bo ta pober, clase medio of rico: spaar placa ta importante. E ta rekeri disciplina y sacrificio, pero e bentahanan ta hopi. E porcentahe di bo salario cu bo ta dispuesto pa spaar ta un balansa cu bo mes tin cu dicidi. Mas simpel bisa, cuanto bo ta scoge pa spaar ta e escogencia entre biba bon awe, y biba miho mañan. Of a lo menos, mesun bon cu ayera. 
 

Emergencia / gasto inespera 

Preveni cu cualkier emergencia automaticamente ta un problema financiero tambe. E por ta algo cu a kibra den bo cas, bo auto, un situacion medico (AZV no ta cubri tur gasto medico!) y hopi mas. Si bo no a spaar y pone placa un banda, gastonan inespera por bira un problema serio y hinca’bo den debe. Hasta si bo tin debe pa paga caba, haci tur esfuerso pa pone sikiera un tiki placa na banda cada luna. Paso ora gasto inespera presenta, bo kier evita pa mester fia placa (atrobe), creando mas debe (atrobe), kedando ‘pega’ den un circulo di debe (cu interes). 

Un otro bentaha di spaar un ‘fondo pa emergencia’ ta cu bo por biba mas trankil, sin mester haya stress y preocupa pa kico lo pasa si un emergencia of otro gasto inespera presenta. 
Preveni cu cualkier emergencia automaticamente ta un problema financiero tambe.
 

Perde trabou 

Hopi di nos ta biba paycheck to paycheck, cada luna gastando henter nos salario. Esaki por haci’bo hopi vulnerabel. Si pa un of otro motibo bo wordo kita for di trabou, sea pa bo mesun culpa of pa motibonan financiero-economico di bo dunado di trabou, bo no lo tin (mucho) placa pa sobrebibi un temporada sin trabou. Si bo no tin e suerte di haya un trabou den tempo corto, bo lo hayabo ta busca ayudo social na gobierno cu kisas no ta suficiente pa cubri tur bo gastonan. Of bo ta hayabo ta tuma cualkier trabou, cu cualkier salario y cualkier trato como empleado, paso bo a haci bo mes mucho dependiente pa e necesidad di e siguiente pago di bo salario. 
Hasta sin perde trabou, hopi ta haya nan ta acepta mal trato di nan dunado di trabou, pa motibo di miedo pa perde nan trabou. Paso sin placa poni na banda, nan ta sumamente dependiente di nan dunado di trabou y ta cay den problema asina cu nan perde un trabou. 
Hasta si bo tin debe pa paga caba, haci tur esfuerso pa pone sikiera un tiki placa na banda cada luna.
 
Esaki no ta conta solamente pa esnan cu no ta gana hopi placa. Hopi entre nos tin un bon salario pero tambe ta gasta nan salario completo cada luna. Cu perdida di trabou, nan no por mantene nan nivel financiero di bida y por cay den debe mas lihe cu bo lo pensa. 

Cu suficiente placa poni na banda, bo por sobrebibi y hasta mantene bo estilo di bida durante un temporada sin entreda. Mientrastanto bo tin tempo pa busca un trabou cu bo ta desea. Tambe bo por tin e opcion di bay cu pensioen na un edad mas hoben. Esaki ta mas relevante ainda si bo tene na cuenta cu e edad di pensioen a aumenta y kisas den futuro por bolbe aumenta. 
 

Experiencianan y inversion 

Kico bo ta prefera: sali trip tur weekend, of trip menos y spaar pa experiencianan inolvidabel? Kisas bo ta den un situacion financiero cu un biahe pa pasa un vakantie den exterior no ta responsabel. Kisas bo por masha bon. Analisa bo gastonan inecesario. Evalua bo disciplina pa sacrifica di gosa un tiki awo, pa experiencianan inolvidabel den futuro. Un bon analisis di con bo ta gasta bo placa por sorprende’bo.  
E punto crucial no ta e placa, pero e trankilidad, siguridad y opcionnan cu e por crea.

Un otro motibo pa spaar, ta pa bo por inverti den bo mes. Por ehempel, si bo kier lanta bo propio negoshi of si bo kier sigui un estudio pa por cambia di profesion. Kisas bo tin yiu y bo kier pa nan tin mas opcion den bida. Kisas bo kier por yuda esnan den necesidad. 

Spaar placa por ta e diferencia entre keda unda bo ta (den bo carera y financieramente) y progresa. E punto crucial no ta e placa, pero e trankilidad, siguridad y opcionnan cu e por crea. Bo no mester ta rico pa ta feliz. Pero e trankilidad, siguridad y opcionnan cu suficiente placa por crea, por afecta bo calidad di bida positivamente. Cuanto ta suficiente, ta depende di con bo kier biba. Den tur caso, spaar placa lo yuda.