Cannabis parti 1: Kico ta cannabis?

171008 cannabis 001Na Aruba nos conoce varios droga legal, entre otro cigaria y alcohol. Hopi ta esnan cu kier legalisa un otro droga: cannabis. Pero kico tur nos sa di cannabis? Den e serie di articulo aki, nos ta explora e historia di cannabis, e usonan medicinal, e usonan industrial, su peligernan y su futuro. 

Kico ta cannabis?
Cannabis ta un mata. E ta crece naturalmente den partinan di mundo den partinan cu conoce un clima tropical y humedo. E nomber cientifico pa cannabis ta Cannabis sativa L. 

Cannabis tin hopi uso. Entre otro, e flor y blachi di cannabis ta contene e substancia psicotropico THC (tetrahydrocannabinol) y pues por wordo usa pa produci medicina y droga. E simiya di cannabis por wordo usa pa produci azeta y e palo di cannabis cu su contenido di fibra por wordo usa pa produci paña, papel etc. 

Un otro kimico presente den cannabis ta CBD (cannabidiol). Cannabidiol ta e kimico cu ta wordo usa mas y mas pa su propiednan medicinal. Tur mata di cannabis ta produci THC y CBD, pero e nivel di THC/CBD ta varia pa especie. Mas despues lo elabora riba e usonan mulitple di cannabis. 
171008 cannabis 003Cannabis sativa versus Cannabis indica
Tin hopi discusion tocante e especienan di cannabis. En general, por bisa cu Cannabis sativa L. conoce dos especie; Cannabis sativa y Cannabis indica.  Un diferencia entre sativa cu indica ta nan tamaño; sativa ta crece mas grandi cu 1.5 meter mientras cu indica ta mas chikito (entre 0.6 cu 1.5 meter). 

Un otro diferencia ta e cantidad di THC y CBD. Cannabis indica tin un contenido mas halto di CBD y ta wordo usa pa calma y relaha mientras cu Cannabis sativa tin mas THC y tin un efecto mas celebral y energetico. Un persona lo por usa Cannabis sativa pa stimulacion energetico, mientras cu un Cannabis indica lo por yuda e persona pa relaha. 

Tambe por papia di Cannabis ruderalis, un tipo di mata mas chikito cu ta produci hopi tiki THC. Cannabis ruderalis ta asina diferente cu en general ta wordo considera un especie riba su mes. 
171008 cannabis 004Historia
Evidencia di su uso como un substancia psicotropico ta data for di tempo prehistorico, tanto na Europa, Asia y Africa. Ya na aña 440 AC den un publicacion di e Griego Herodoto por lesa con un pueblo di continente Eurasia tabata kima parti di e mata anto usa e vapor di cannabis den nan sauna (baño di vapor). 

Den edad clasico, Griego y Romano tabata usa cannabis. Tambe den imperio Musulman, cannabis a fomenta di Medio Oriente te cu parti nort di Africa. Na 1545 colonistanan Spaño a trece cannabis na Chile unda el a wordo cultiva pa su fibra. Similarmente na norte di continente Americano, hemp, un tipo di cannabis pa cultivacion industrial, a wordo planta pa asina traha cabuya, paña y papel. 

Cannabis y religion
Diferente religion tin un propio opinion tocante uso di cannabis. Na Mexico, siguidonan di santa muerte ta usa e huma di cannabis den nan ritualnan. Tambe esnan cu ta practica e religion di rastafari ta usa cannabis. Segun e religion rastafari, cannabis ta un sacramento y un mata hopi beneficial. Den e religion rastafari, e Mata di Bida biblico cu ta wordo describi den buki di Genesis ta wordo considera un mata di cannabis. 

Pero en general, di budismo te cu cristianismo y islam te cu scientology, uso di cannabis ta wordo descurasha. Hopi biaha esaki ta paso uso di cualkier substancia intoxicante ta wordo prohibi. Por ehempel, den islam, e Quran no ta prohibi cannabis directamente pero si ta bisa cu cannabis ta un khamr (intoxicante). Como cu islam ta prohibi substancia intoxicante, e ora por deduci cu cannabis ta prohibi.  
171008 cannabis 005Varios misa protestant a indica cu nan ta para tras di legalisacion di cannabis medicinal. Den catolicismo aceptacion di cannabis no por conta riba hopi sosten. Papa Francisco, na 2013 ora cu e ainda tabata cardinal, a splica cu legalisacion di droga no lo yuda combati adiccion di droga.

Den judaismo, ultimo añanan mas y mas lider religioso a cuminsa acepta cannabis medicinal como kosher. Den hinduismo hende ta bebe bhang. E bebida aki, cu ta contene cannabis, ta purifica pika, yuda preveni e miseria di fierno den un futuro bida y ta trece e persona mas serca di e dios Shiva. 


Serie: Cannabis

Parti 1: Kico ta cannabis?
Parti 2: Usonan medico di cannabis
Parti 3: Usonan industrial di cannabis
Parti 4: Peligernan di cannabis
Parti 5: Legalisacion y futuro di cannabis rond mundo