Advertise on BonPaSa.com
Advertise on BonPaSa.com

Cannabis parti 2: Usonan medico

(Reading time: 3 - 6 minutes)

171203 cannabis medicinal 001
Na Aruba nos conoce varios droga legal, entre otro cigaria y alcohol. Hopi ta esnan cu kier legalisa un otro droga: cannabis. Pero kico tur nos sa di cannabis? Den e serie di articulo aki, nos ta explora e historia di cannabis, e usonan medicinal, e usonan industrial, su peligernan y su futuro. 

Kiko ta cannabis medicinal?

Cannabis medicinal ta referi na e uso di cannabis den tratamento di malesa y maneho di sintoma. E mata di cannabis tin un historia di uso medicinal cu ta bay bek miles di aña den varios cultura, pero su uso ta keda controversial. Mientras cu varios organisacion y instituto di peso kier pa cannabis wordo legalisa, otronan ta keda contra di esaki. 

Tin varios manera pa usa cannabis medicinal, incluyendo tintura cu likido, vaporisa of huma, come comestibel di cannabis, guli capsula/tablet, absorbacion via di un 'patch' riba cuero of pa medio di spray oral/dermico.

Cannabis ta wordo usa pa varios tratamento. Entre otro, cannabis medicinal ta wordo usa pa alivia nausea y sacamento bou di pashent cu ta den tratamento di kimoterapia. Tambe tin indicacion cu cannabis por wordo procesa como medicina pa combati cancer. Otro uso di cannabis ta pa yuda persona cu ta sufri di HIV/AIDS recobra nan apetit. Tambe cannabis medicinal por trata dolor cronico manera artritis y alivia dolor di musculo.

Cannabis: e droga anti-droga?
Un strategia pa trata adicto ta reduccion di daño. E strategia aki tin como meta pa reduci e uso di droga bou di persona adicto cu sea no por, of no kier, stop di consumi droga. E meta simplemente ta progreso, y no perfeccion. Reduccion di daño ta ensera cu embes di castiga e adicto, ta yuda e persona cu tin problema cu droga biba un bida mihor y mas saludabel.

Cannabis ta hunga un rol den e filosofia aki. Usuarionan di droga pisa mane cocaina, ta cuminsa usa cannabis, pa asina gradualmente stop di usa cocaina y keda solamente riba cannabis. E meta final, por keda abstencion total di droga, pero e caminda pa yega na e abstencion total ta basa riba pasonan gradual.
drugs 2793133 640
Investigacion haci na Canada y publica den e revista cientifico Addictive Behaviors a conclui cu uso intencional di cannabis ta efectivo den reduci uso di crack bou di adicto (Socías et al, 2017). A pesar cu e uso di cannabis tabata mas halto na inicio di e 'uso intencional', e uso a disminui cu tempo. 

Maske cu cannabis tambe lo por tin efectonan menos desea, e ta un droga hopi mas 'safe' cu cocaina y heroina. Especialmente den e caso di heroina, investigacionnan ta mustra cu e substancia CBD cu ta presente den cannabis por cura cierto daño cu heroina ta hasi den e celebro. 


Charlotte's Web
Un caso cu a capta atencion di prensa rond mundo ta esun di Charlotte Figi (naci 18 di oktober, 2006).  E mucha muhe aki tabata sufri di Dravet Syndrome y esaki tabata resulta den atakenan di epilepsia cada 20 pa 25 minuut. Den e caso di Charlotte, e tabata haya atake cu tabata dura 15 pa 25 minuut y tin biaha hasta dos pa cuater ora. Na mas cu un ocasion su curason a stop di bati y su mama mester a rebiba e mucha haciendo uso di reanimacion cardiopulmonar (cpr). 

Charlotte tabata tuma un combinacion di shete diferente medicina farmaceutico pa purba alivia su situacion pero ningun remedi a para e atakenan di epilepsia. Na edad di cinco aña, e atakenan a bira asina pisa y debilitante cu dokternan a avisa su famia pa cuminsa haci preparacion pa su fayecimento. Mirando cu Charlotte ya no por a cana of come, nan a acepta e diagnosis y a hibele cas pa asina e por muri trankil den presencia di su famia. Pero esaki no tabata e caso.

E solucion pa rescata y mehora e bida di Charlotte Figi a resulta di ta nada otro cu cannabis medicinal. Pa ta specifico, un variedad di cannabis cu ta contente hopi CBD y masha tiki THC. 


(Kico ta CBD y THC? Lesa parti 1 di e serie aki.)

For di prome biaha cu a duna Charlotte un tintura di e cannabis medicinal aki, su atakenan a baha di 400 pa siman te cu un of hasta cero. Mirando con bon e variedad di cannabis aki a yuda Charlotte, e producente a dicidi di duna e variedad e nomber Charlotte's Web, na honor di Charlotte Figi. Pa mas detaye di e caso di Charlotte por mira e presentacion di Josh Stanley (TEDx Colorado, 2013):

Paisnan unda Cannabis medicinal ta legal
medical cannabis legal wedd countries states 1024x432
Fuente: Lift, 2017 
Mundialmente, uso recreacional di cannabis ta ilegal na mayoria pais, pero tin varios pais rond mundo unda cu uso di cannabis medicinal ta sea legal of decriminalisa. Por ehempel, Canada, Chile, Colombia, Alemania, Grecia, Israel, Italia, Polonia, Hulanda, Peru y Uruguay. Na Merca, legalidad di e uso medicinal di cannabis ta depende riba e ley di e estadonan en particular. Specificamente, na Merca, mas cu mita di tur estado ta permiti uso medicinal di cannabis.  
  
Efectonan secundario
Uso di cannabis medicinal a corto plaso por trece cune efectonan secundario por ehempel mareo, sinti cansa, sacamento y halucinacion. E efectonan secundario a largo plaso no ta completamente conoci, pero tin indicacion cu lo por tin problema di memoria y cognicion, riesgo di adiccion y e posibel desaroyo di schizofrenia bou di usuario hoben. 

Ciencia ta tuma tempo
A pesar di varios anecdota, estudio y casonan documenta cu ta mustra riba e efectonan positivo di uso di cannabis (CBD), e ta algo cu te ainda no tin consensus riba dje y keto bay ta wordo investiga. Ciencia ta tuma su tempo y lo sigui tuma (mas) tempo prome cu tin varios estudio di termino largo cu ta verifica y valida uso di cannabis medicinal pa trata problema y malesa, manera entre otro atakenan di epilepsia.

 

Serie: Cannabis

Parti 1: Kico ta cannabis?
Parti 2: Usonan medico di cannabis
Parti 3: Usonan industrial di cannabis
Parti 4: Peligernan di cannabis
Parti 5: Legalisacion y futuro di cannabis rond mundo