Advertise on BonPaSa.com
Advertise on BonPaSa.com

Abo conoce e 7 tipo di affairs?

(Reading time: 3 - 5 minutes)

couple laying
Un affair ta un infidelidad, na unda un of tur dos persona den un relacion ta busca intimidad, romance y/of aventura pafo di e relacion teniendo su actuacionan scondi pa e otro.
Den relationship coaching nos conoce 7 tipo di affair:

1. Spontaneous / Impulsive affair

Un infidelidad no-planea, cu a tuma luga a base di un decision impulsivo, por ehempel e conocido “one night stand.” Hopi bes tawata tin alcohol of droga envolvi y e persona tawata den un ‘high’, flirty mode, pasando bon y a tuma decision ‘in the heat of the moment’ sin pensa mas leu. Mayoria bes e persona ta hopi arepenti ya cu ta trata aki di un ‘slip’ cu e nunca a spera di comete y nunca mas lo comete.

2. Intimacy / Conflict Avoidance affair

Mayoria affair ta cay den e categoria aki. E tipo di affair aki tin di haber cu problema di relacion cu ta surgi di problemanan riba nivel personal of trauma di infancia di un of tur dos persona. A consecuencia di esakinan e persona(nan) ta evita conflicto y contacto intimo na unda tin emocion envolvi, den e caso aki, cu e pareha. E tipo di affair aki ta sirbi como un sorto di ‘escape’ di e relacion of como un oportunidad pa experiencia e intimidad cu ta sinti cu no por haya den e relacion. 

3. Philanderer / Casanova affair

Esaki ta e affair tipico di e ‘casanova’ of ’player’. Esun cu ta haci su mes culpabel na e tipo di affair aki generalmente ta e hende homber di karakter machista. Generalmente e tipo di affair aki no tin emocion envolvi, e tercera persona no ta mas cu un conkista. E persona aki ta ripiti su actonan sin sinti ningun tipo di remordimiento. En realidad e ta un persona hopi insigur y p’esey e ta sinti necesidad constante pa proba su masculinidad. 
couple palms

4. Entitlement / Revenge affair

Esaki ta e tipo di affair cometi door di personanan cu ta sinti cu nan por, mag of merece esaki. Por ehempel, un persona cu poder economico, un persona cu un ‘celebrity status’ of un persona cu pa un motibo of otro kier tuma venganza riba e pareha. E persona aki no ta mira dicon e mester limita su mes. E persona aki, of ta un persona cu tin tendencia narcista of ta un persona cu a wordo traiciona door di su pareha: ‘awor ta mi beurt, pa bo wak con bo ta sinti’. 

5. Split self / Romantic affair

Esaki ta un affair tipico di un ‘midlife crisis’ na unda e persona ta distancia su mes di e persona cu ela bira y ta sinti e necesidad pa afeccion y atencion di un of mas tercera persona. E tipo di affair aki ta proporciona un coneccion emocional hopi profundo, lagando e persona sinti ‘alive’. Esaki generalmente lo tuma luga den un relacion cu a fria. E persona ta pensa cu no tin nada mas pa spera di e relacion pero ta keda sinti responsabel pa e yiunan of ta keda pa motibo di stabilidad economico, mientras e ta busca romance pafo di e relacion.
couple hug

6. Exit / Separation affair

Esaki ta wordo cometi door di e persona cu kier sali di un relacion di termino largo, y ta uza e affair como motibo. E persona tin e tendencia di kier evita conflicto of di expresa su emocionnan, of a expresa si necesidadnan repetidamente sin haya oido di e pareha y e resentimiento a crece te na e punto cu e persona no por soporta mas di keda den e relacion. Pa evita di duna splicacion detaya di su sentimientonan, e persona ta opta pa uza e affair como motibo pa kibra e relacion, y no ta dispuesto pa reconsidera of wak atras.

7. Sexual Addiction affair

Sex addiction no tin di haber cu problema di relacion, pero, igual na otro tipo di addiccion, mas bien ta un reto personal cu tin su efecto ariba e relacion. E persona no por haya suficiente sex y ta constantemente bezig ta satisface su mes y buscando estimulo, incluyendo entre otro sexting, pornografia y prostitucion. Un pareha no ta suficiente pa satisface su apetito. Esaki ta un persona cu mester di ayudo psicologico. E persona no ta haci esaki a proposito, mirando cu esaki ta algo cu e no por controla. 

Believe it or not, there’s hope

Cu excepcion di e ‘exit affair’ ta posibel pa recupera di cualkier tipo di affair, si ambos kier esaki y busca ayudo adecuado. Un affair ta afecta e fundeshi di e relacion, y pa e motibo ey mester cuminsa ful di nobo, pues e lo tuma su debido tempo. Basicamente nos ta papiando di morto di e relacion y nacemento di un relacion nobo na unda e personanan lo sa di comunica miho y mas abiertamente tocante nan sentimientonan y deseonan.  
Desiree Swaen
Love Coach Desiree Swaen. Potret: Ayrton Tromp

Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook