Advertise on BonPaSa.com
Advertise on BonPaSa.com

Traha 'night shift' ta un riesgo pa bo salud

(Reading time: 2 - 3 minutes)

171105 traha anochi 01Na Aruba tin hopi hende cu sea tin biaha of regularmente ta traha anochi (night shift). Traha den oranan di anochi ta stroba e ritmo di dia di bo curpa y por conduci na efectonan negativo pa salud. 

Diabetes y malesa cardiaco
A corto plazo, trabou di anochi ta crea problema di salud. Por ehempel, problema di drumi ta casi dos biaha mas prevalente bou' persona cu ta traha anochi. Tambe tin hopi indicacion cu traha anochi tin riesgo a largo plazo. Traha night shift ta subi riesgo di diabetes mellitus (typo 2) y malesa cardiovascular y e riesgo aki ta sigui subi mas cu cada aña di traha anochi.

E riesgo di diabetes y malesa di curason ta bin door cu e procesamento di glucose y vet ta menos activo anochi compara cu den dia. Si un persona come anochi esey por conduci na nivelnan di glucose mas halto den sanger y tambe un absorbacion di vet den e curpa cu ta mas halto compara cu den dia. Esaki por ehempel por causa sobrepeso y prediabetes. Ambos ta factornan di riesgo pa diabetes typo 2 y malesa cardiovascular. 
171105 traha anochi 06Problema di drumi
Tambe tin un relacion fuerte entre traha anochi y problema cu drumi. E problemanan aki ta ocuri dos biaha mas hopi entre persona cu ta traha night shift.

Varios proceso biologico den nos curpa ta depende di un ritmo di dia, cu ta wordo guia pa nos 'klok biologico' interno. E klok aki ta percura pa e curpa humano reset su mes tur dia y core 'pareu' cu e ritmo di luz y scuridad di nos planeta.

Ora bo traha anochi, bo ta stroba e ritmo aki door cu e curpa ta lanta y activo na e momento cu e curpa humano preferiblemente mester ta drumi y drumi na momento cu e curpa kier ta lanta. Consecuentemente, e klok biologico ta purba di adapta su mes na e situacion nobo pero esaki ta costa tempo y hopi biaha no ta logra. Debi na esaki, procesonan den e curpa por wordo interumpi, y esaki ta resulta den un interupcion di drumimento y un interupcion den e curpa su capacidad di recuperacion.
171105 traha anochi 05
Investigacion y recomendacion
E investigacion cu a conduci na e resultadonan aki a wordo haci na Hulanda pa un comision special di Gezondheidsraad a base di peticion di minister di Asuntonan Social y Labor dia 22 di mei 2013. Despues di cuater aña di investigacion, e resultadonan a wordo presenta dia 24 di oktober 2017.

A base di e investigacionnan aki, na Hulanda, Gezondheidsraad a recomenda na minister pa purba di limita trabou di anochi unda cu ta posibel.