E paspoortnan mas ‘poderoso’ di mundo [2017]

passportArton Capital a lansa nan Global Passport Power Rank 2017, cual ta un lista di e paspoortnan mas ‘poderoso’ na mundo pa aña 2017. E lista a wordo forma a base di cuanto pais bo por bishita cu un paspoort sin haci un peticion pa un visa. Esaki ta inclui pais cu ta duna un visa asina bo yega e pais (visa on arrival) of si bo por bishita un pais por medio di solamente un autorisacion electronico.

E paspoort di Singapur a resulta di ta esun mas ‘poderoso’ a base di por bishita 159 pais sin visa. Ta pa prome biaha cu un pais Asiatico tin e paspoort mas ‘poderoso’. Singapur tawata empata cu Alemania na 158 pais, pero recientemente Paraguay a kita e rekisito di un visa pa esnan cu paspoort di Singapur. Asina Singapur a surpasa Alemania, mientras cu Alemania a keda na di dos luga cu un score di 158, sigui pa Suecia y Zuid Korea, ambos cu un score di 157.

Aruba no tin su propio paspoort, pero Arubianonan tin e nacionalidad y un paspoort Hulandes. E paspoort Hulandes a haya un score di 155 y ta empata na di diesdos luga hunto cu seis otro pais.
Nos bisiña di mas serca, Venezuela, a logra un score di 119, mientras cu Colombia a ricibi un score di 108. E pais Suramericano cu e score mas halto ta Brazil cu 144 punto.

Surinam, cu tawata forma parti di reino Hulandes te cu 1975, a logra un score di 69 como pais independiente.
Den Caribe, Barbados a ricibi e score di mas halto cu 136 punto, sigui pa Bahamas (131) y Saint Kitts and Nevis (127).  E islanan Caribense cu e score mas abou ta Republica Dominicana (62), Cuba (60) y Haiti (54).

E paisnan cu e score mas abou ta Pakistan (26), Irak (26) y Afganistan (23).

Banda di facilita biahamento pa ciudadanonan, varios pais ta haci negoshi cu nan paspoort, ofreciendo esnan cu ta paga y/of inverti sumanan grandi den nan pais un paspoort.
Klik aki pa wak e lista completo.