Kico ta infidelidad emocional?

 

 

Infidelidad emocional generalmente ta cuminsa di un manera hopi inocente, via un simpel amistad. Door di hinca mas y mas energia emocional, e amistad platonico aki ta cuminsa transforma den un conexion emocional cu componente romantico, cu a lo largo lo por perhudica e intimidad di e relacion oficial.  

 

Hopi di esaki tin di haber cu uzo di social media cu a haci mas accesibel pa sera amistad cu hendenan atractivo, manera Facebook. Facebook Messenger y Whatsapp entre otro, ta plataformanan ideal pa combersa, pero tambe pa intercambia deseonan, portretnan y videonan cu of sin componente sexual. Hopi hende, aunke consciente di esaki, ta sinti nan mes atrai pa e riesgo cu e ta trece cun’e, y ta dispuesto tambe pa core e riesgo aki pa un momento excitante, principalmente si cos a fria den e relacion oficial.  

 

Tin hende cu ta pensa cu un infidelidad emocional ta algo completamente inofensivo, algo ‘virtual’, un wega, algo cu no ta existi den bida real. Hasta si bo wak e asina, no tin duda cu un infidelidad emocional ta ‘one step away’ di un infidelidad completo. Mas cu mita di infidelidad emocional ta converti nan mes na cierto momento den un infidelidad cu componente sexual. Y si esaki no pasa, ta pasobra pa un motibo of otro e no a logra.  

 

Pa e pareha oficial, e parti mas doloroso di un indifelidad emocional ta e hecho cu el’a wordo gaña, traiciona, humilia y tuma pa kens. Pues, e consecuencia di un infidelidad emocional por ta mesun serio cu den caso di un infidelidad cu componente sexual, ya cu e ta nifica un kiebro di confianza cu kizas ta resulta ireparabel.    

Bo tin un amigo/amiga cu ta nifica hopi pa’bo y cu bo ta comparti diariamente cun’e?  

Aki ta sigui algun ehempel cu por indica cu bo ta envolvi den un infidelidad emocional: 

•  Bo ta alehando for di bo pareha.
•  Bo pareha a bira “laf” of hasta “insoportabel”.
•  Bo ta preocupa pa y ta soña/fantasea cu bo amigo/amiga mas y mas.  
•  Bo no ta interesa of ta evita pa ta intimo cu bo pareha, sea emocional of sexualmente.  
•  Bo ta bira nervioso, preocupa of rabia ora bo mand’e un message y e no contesta’bo.  
•  E hecho cu e ta pasa tempo cu su amistadnan, familiares of su pareha ta molestia’bo.  
•  Bo ta prefera di comparti problemanan personal of problemanan di bo relacion cu e persona aki en bes di papia nan cu bo pareha.  
•  Bo ta sinti cu e persona aki ta compronde’bo miho cu bo pareha lo por compronde’bo.  
•  Bo ta tene e relacion aki secreto pa bo pareha, of door di insisti cu boso tin solamente un amistad, of door di delete mensahenan y/of uza otro nomber (pseudonimo) ora bo ta referi na e persona aki den bo lista di contacto. 

 

Cuminsa ripara bo accionnan y sea sincero cu bo mes. 

Si bo ta balora bo relacion oficial y no kier perde bo pareha, actua awo y busca ayudo pa traha ariba e cosnan cu bo ta sinti cu no ta bayendo bon den bo bida personal y/of den bo relacion.