Advertise on BonPaSa.com
Advertise on BonPaSa.com

Consecuencianan di Abuso y Negligencia di Mucha

(Reading time: 2 - 4 minutes)

teddy
E efecto cu abuso sexual, abuso violento y negligencia di mucha por tin riba un mucha no ta limita na un termino corto. Hopi estudio ta indica cu un mucha cu a wordo abusa of neglicia por sufri di e efectonan pa resto di su bida.

E efectonan por bay hopi leu y por cambia e rumbo di e bida di e victima drasticamente. E motibonan tras di abuso y negligencia di mucha ta compleho. E forma con un comunidad ta trata abuso y negligencia por yuda baha e cantidad di casonan abusivo y tin un efecto positivo den reduci e consecuencianan cu victimanan ta experiencia durante nan bida.

Celebro
Maltrato por resulta den lesionnan leve, grave y hasta den morto. Mester remarca cu lesionnan fisico cu ta mustra leve tambe por tin hopi consecuencia psicologico. 

Un forma di abuso conoci ta ora un baby wordo sacudi, resultando den loke ta wordo yama shaken baby syndrome. E forma di abuso aki por wordo categorisa como un abuso celebral (na cabes, ‘abusive head trauma’). Segun un publicacion di Centers for Disease Control and Prevention, un di cada cuater victima di shaken baby syndrome ta fayece y casi tur ta experiencia consecuencianan serio pa nan salud, por ehempel problema cu vision y oido, retraso den desaroyo y inhabilidadnan fisico.
Durante infancia, desaroyonan celebral crucial mester tuma luga. Segun Armanda Tarullo, PhD, abuso y negligencia di mucha a demostra di stroba partinan importante di e celebro di e mucha di crece y forma manera mester ta y riba termino largo e maltrato por afecta su abilidadnan cognitivo, academico y tambe su abilidad pa domina lenguahe.
Un di cada cuater victima di shaken baby syndrome ta fayece y casi tur ta experiencia consecuencianan serio pa nan salud.”

Consecuencianan psicologico

Abuso y negligencia di mucha por tin efectonan emocional riba un mucha inmediatamente. E mucha por experiencia miedo, sentimentonan di isolacion y un incapacidad pa confia hende. E mesun efectonan aki por resulta den consecuencianan psicologico durante bida di e victima, manera depresion, ansiedad, dificultad cu relacion, borderline personality disorder, low self-esteem y mas problema psicologico. E consecuencianan aki por tin nan efecto pa bida largo. Segun un estudio haci door di varios dokter, 54% di casonan di depresion y 58% di intentonan di suicidio bou di muhe ta conecta na experiencianan dañino durante infancia.

Segun un estudio di Bruce D. Perry (M.D., PhD.) negligencia di mucha door di nan mayor(nan) ta wordo asocia cu borderline personality disorder, cual ta un enfermedad mental cu ta stroba e victima di maneha su emocionnan efectivamente. Segun e estudio, negligencia di mucha tambe ta wordo asocia cu e comportacion cu den futuro e victima ta duna afeccion na personanan desconoci of cu e no conoce bon. Otro comportacionnan di un victima cu ta wordo asocia cu negligencia ta agrecion y comportacionnan adulto inapropia.  
54% di casonan di depresion y 58% di intentonan di suicidio bou di muhe ta conecta na experiencianan dañino durante infancia.”

Delincuencia  

Varios estudio a documenta e corelacion entre abuso di mucha y futuro delincuencia door di e mucha. Den e publicacion ‘The relation between abuse and violent delinquency: The conversion of shame to blame in juvenile offenders’ ta wordo conclui cu crianza abusivo tin un impacto directo y indirecto riba delincuencia. Segun e estudio, mucha cu a experiencia abuso ta nuebe biaha mas probabel di ta involvi den actividadnan criminal.

Diferente estudio ta indica cu e probabilidad cu un mucha lo bay huma cigaria, abusa di alcohol of usa otro droga ta aumenta si e mucha a wordo abusa of neglicia. Un estudio a hasta conclui cu mucha homber cu seis of mas experiencia abusivo ta 4000% (cuater mil) mas probabel pa den futuro usa droga cu ta wordo injecta den vena (por ehempel heroina).

Tin mas posibel consecuencia pa victimanan di abuso y negligencia di mucha. E impacto social di e consecuencianan aki tambe por ta extenso.
E probabilidad cu un mucha lo bay huma cigaria, abusa di alcohol of usa otro droga ta aumenta si e mucha a wordo abusa of neglicia.”

Severidad di consecuencia 

No tur mucha cu a wordo abusa of neglicia den un manera similar, lo experiencia e mesun consecuencianan riba termino largo. Tin mucha cu ta experiencia relativamente tiki di e posibel consecuencianan durante nan bida, mientras cu otro ta sufri hopi.
Factornan cu ta afecta e severidad di e consecuencianan di abuso y negligencia di mucha ta inclui:
  • edad y nivel di desaroyo na momento cu abuso of negligencia ta tuma luga;
  • tipo di maltrato, sea fisico, sexual, negligencia, etc.;
  • frecuencia, duracion y severidad di e maltrato;
  • e relacion entre e mucha y e abusador;
  • e forma con famia y comunidad ta trata victimanan di abuso y negligencia.