Advertise on BonPaSa.com
Advertise on BonPaSa.com

E paisnan menos y mas corupto na mundo

(Reading time: 2 - 3 minutes)

TI CPI 2017 global map
Transparency International a revela nan 'Corruption Perceptions Index' anual cubriendo aña 2017. Un total di 180 pais y teritorio por a haya un score di 0 (hopi corupto) pa 100 (menos corupto). E scorenan a wordo duna a base di percepcionnan di corupcion den sector publico segun experto y empresario.


E resultado ta mustra cu corupcion den sector publico ta un problema grandi y mundial. Dos tercera parti di e 180 pais y teritorionan a score menos cu 50. E averahe mundial ta apenas un score di 43. E region menos corupto di mundo segun Transparency International, West Europa, no a yega mas halto cu un score averahe di 66. E score aki ta significantemente mas halto cu e parti oost di Europa, cu tin un averahe di 34. E parti central di Asia tambe tin un averahe di 34, mientras cu e region cu e averahe mas abou ta e region sub sahara di Africa (32).


E scorenan di paisnan individual ta mustra diferencianan mas grandi, incluyendo scorenan hopi halto y hopi abou. Nieuw-Zeeland ta lidera e lista cu un score di 89, sigui pa Dinamarca (88), Finlandia (85), Noruega (85) y Suisa (85). Diesdos pais a logra un score riba 80. Seis di e paisnan aki a bay atras compara cu nan score na 2016, mientras dos di e paisnan aki a bay dilanti.

E paisnan mas corupto segun e index di Transparency International ta Somalia (9), Zuid-Sudan (12), Siria (14), Afganistan (15), Yemen (16) y Sudan (16).
 

Pa loke ta trata Caribe, Barbados a logra e score mas halto (68), progresando 7 punto compara cu 2016. E pais Caribense cu e score mas abou ta Haiti (22). Venezuela, nos bisiña mas serca, tin un score di 18. Aruba y e otro islanan den reino Hulandes no a haya un score den e index di Transparency International.

Un observacion interesante ta e indicacion cu paisnan cu ta ofrece menos proteccion na prensa y na organisacionnan no-gubernamental (NGO's) tin e tendencia di ta mas corupto. Ta alarmante cu tur siman por lo menos 1 periodista ta wordo asesina den un di e paisnan hopi corupto. 

Transparency International ta haci un yamada na comunidadnan rond mundo pa yuda combati corupcion por medio di encurasha y proteha libertad di expresion y prensa independiente. Transparency International tambe ta recomenda transparencia den gobernacion, den financiamento di partido politico y den informacion tocante ken ta propietario di compania. E recomendacion ta pa haci e informacionnan aki accesibel pa prensa y comunidad en general. 

Klik aki pa lesa e brochure cu e resultadonan.